【قات سۅۅگۉ : 】
ۇلۇتتار ۇيۇمۇنۇن جوعورقۇ سوتۇ كوسوۋونۇن ۅز كۅز قاراندىسىزدىعىن جارىيالاعان دەكلاراتسئياسى ەل ارالىق مىيزامداردى بۇزعان ەمەس دەگەن بۉتۉمۉن جارىيالادى. بۇل چەچىم مىيزامدىق كۉچكۅ ەە ەمەس، وشەنتسە دا ەل ارالىق ەڭ جوعورقۇ سوتتۇن پىكىرى بەلگراد مەنەن پرئشتىنانىن ورتوسۇنداعى تالاشتىن تاعدىرىنا تااسىر ەتىشى مۉمكۉن.
وشوندوي ەلە باشقا ۅلكۅلۅردۅگۉ سەپاراتىستتىك، جە جىكچىل قىيمىلداردى شىقتاندىرعان دوكۇمەنت بولۇشۇ اجەپ ەمەس.
ۇلۇتتار ۇيۇمۇ الدىنداعى سوتتۇن چەچىمى كوسوۋونۇن تەگەرەگىندەگى تالاش-تارتىشقا كۅپتۅن بەرى كۅز سالىپ كەلاتقاندار ۉچۉن چوڭ جاڭىلىق دەلە بولعون جوق. 2008-جىلى كوسوۋو چۅلكۅمۉ بئر تاراپتۇۇ كۅز قاراندىسىزدىعىن جارىيالاعاندان بەرى انىن جاڭى ستاتۇسۇن ا ق ش، يەۋروبئرىمدىككە كىرگەن بئر قاتار ۅلكۅلۅر باش بولعون 70تەي ۅلكۅ تاانىدى.
دۉينۅلۉك سوتتۇن چەچىمى مىيزامدىق كۉچكۅ ەە بولبوسو دا، انىن ەل ارالىق تااسىرى بار ەكەنىن تۉشۉنگۅن كوسوۋولۇقتار چەچىمدى ۅتۅ چوڭ قۇبانۇۇ مەنەن توسۇپ الىشتى. « كوسوۋو ۉچۉن بۇل چوڭ جەڭىش. بئز ابدان باقتىلۇۇبۇز. داعى دالاي ۅلكۅلۅر كوسوۋونۇن ەگەمەندىگىن تاانىيت دەگەن ۉمۉتۉبۉز جاندى » ، – دەشەت « ازاتتىقتىن » قابارچىسى مەنەن كوسوۋونۇن بوربورۇ پرئشتىنادا مايەكتەشكەن جەرگىلىكتۉۉ الباندار.
وشول ەلە ماالدا سەربئيانىن پرەزىدەنتى بورىس تادىچ سوتتۇن چەچىمىن بئز باشقا جەردە قايرا قاراتابىز، - دەپ بئلدىردى. « سوتتۇن بۉگۉنكۉ چەچىمىن سەربئيا كۉزدۅ ۇلۇتتار ۇيۇمۇنۇن گەنەرالدىق اسسامبلەياسىنا الىپ چىعات. وشوندو سەربدەر مەنەن البانداردىن تارىحىي تالاشى، چىر-چاتاعى سۉيلۅشۉۉلۅر ارقىلۇۇ چەچىلىشى كەرەك دەگەن تۇۇرا تىياناق چىعارىلات » – دەدى تادىچ.
راسمئي بەلگراد وشەنتىپ، كوسوۋو بويۇنچا كۅز قاراشىن ۅزگۅرتپۅي تۇرعانىن، سەربئيانىن ايماقتىق بۉتۉندۉگۉن بۇزعان بئر تاراپتۇۇ دەكلاراتسئيانى تاانىباي تۇرعانىن قايتالادى.
انتكەن مەنەن، ا ق ش نىن ماملەكەتتىك دەپارتامەنتىنىن باسما سۅز ۅكۉلۉ فئلىپپ كروۇلى بەلگراتدى ەل ارالىق سوتتۇن چەچىمىن ەسكە الۇۇعا ۉندۅدۉ. « بۇل چەچىم كوسوۋونۇن ستاتۇسۇنۇن تەگەرەگىندەگى سۇروولورعو جووپ بەرەت. ازىرقى تاپتا چۅلكۅمدۉن قوڭشۇلارى، انىن ىچىندە سەربئيا دا كوسوۋونۇن ەگەمەندىگىن تاانىپ، انى مەنەن جاڭى مامىلەلەر قۇرۇۇعا ۅتۉشۉ كەرەك دەپ ەسەپتەيبئز » ، - دەپ ۉندۅي كەتتى ۋاشىنگتوندۇن ۅكۉلۉ.
سەربدەر كوسوۋونۇ ۅزۉلۅرۉنۉن ۇلۇت قاتارى تۉپتۅلۉپ-ۅنۉگۉشۉنۉن باشاتىندا تۇرعان « التىن بەشىگى » دەپ ەسەپتەشەت. بئروق سەرب ارمئياسى مەنەن كوسوۋولۇق البانداردىن قاندۇۇ ۇرۇشۇن توقتوتۇش ۉچۉن 1999-جىلى ناتو كىيلىگىشىپ، ابادان سوققۇ ۇرعاندان كىيىن راسمئي بەلگراد چۅلكۅمدۉ قولۇنان چىعارىپ ئيگەندەي ەلە بولعون.
ەل ارالىق كۉچتۅر ارالاشقان اسكەردىك وپەراتسئيالاردان كىيىن ۇلۇتتار ۇيۇمۇنۇن قووپسۇزدۇق كەڭەشىنىن اتايىن رەزوليۇتسئياسى مەنەن كوسوۋودو ب ۇ ۇعا باش ئيگەن باشقارۇۇ ورگانى تۉزۉلۉپ، دوكۇمەنتتە بارا-بارا چۅلكۅمگۅ اۋتونومئيا بەرۉۉ جانا ۅز الدىنچا باشقارۇۇنۇ كىرگىزۉۉ پلانى ايتىلعان.
ۇلۇتتار ۇيۇمۇ الدىنداعى سوتتو كوسوۋونۇن بئر تاراپتۇۇ دەكلاراتسئياسى ەل ارالىق مىيزامداردى بۇزات دەگەن پىكىردى ورۇسئيا، قىتاي، ىسپانئيا باش بولعون وندون اشۇۇن ۅلكۅ جاقتادى.
باتىشتىق ەكسپەرتتەر ۇلۇتتار ۇيۇمۇنۇن سوتۇنۇن چەچىمىنەن كىيىن داعى بئر نەچە ۅلكۅ كوسوۋونۇن كۅز قاراندىسىزدىعىن تاانىشى مۉمكۉن، بئروق ۅز ايماعىنداعى سەپاراتىستتىك، جىكچىل قىيمىلداردان چوچۇلاعان قىتاي، ورۇسئيا، گرۇزئيا، ىسپانئيا ۅڭدۉۉ وندوعون ۅلكۅلۅر انداي قادامعا ەچ ۇباقتا باربايت دەپ بەلگىلەشەت.
1998-99-جىلدارى كوسوۋولۇق الباندار مەنەن سەرب ارمئياسى ورتوسۇندا تۇتانعان قاندۇۇ سوعۇش ەل ارالىق ۇيۇمداردىن ماالىماتى بويۇنچا، 12 مئڭدەن اشۇۇن ادامدىن ۅمۉرۉن العان. جۉز مئڭدەگەن كىشى ۉيلۅرۉن تاشتاپ باشقا جاقتان باشقالقاا ئزدۅۅگۅ ارعاسىز بولعون.
بۇلاعى : ازاتتىق سايىتى
كەزەكتەكى ووردۇڭۇز : 
ب ۇ ۇ كوسوۋونۇن ەگەمەندىگىن قولدودۇ 
كۅچۉرۉپ الۇۇ 
باسىپ چىعارۇۇ 
دان «ب ۇ ۇ كوسوۋونۇن ەگەمەندىگىن قولدودۇ » عا بايلانىشتۇۇ مازمۇندۇ ئزدۅۅ
