تەحنىكالىق ۅكۉمۅت پىروفەسسىيونال ەمەس... بـئـلـىـم اپـتـــورۇ : تۅلۅگۅن سۇلايمانوۋ بـئـلىم جۉكتۅگۅن : insap بــئــلـىـم تـــــۉرۉ : كۅچۉرۉلمۅ جۉكتۅگۅن ۇباقتى : 2010-7-26 وقـۇلـعـان ىـرەتـى : 41 ىرەت

【قات سۅۅگۉ : چوڭ ورتو كىچۉۉ】 

         بئزدە پىرەمەر-مىنىستىرلەر ەلگە ۉلگۉ بولوت. بولعوندو دا،  تەسكەرى جاعىنان. قايسى چىنوۋنىك پىرەمەر-مئنىستىر بولسۇن ئشىن ۅكۉمۅت اراباسىن الدىعا تارتۇۇ ەمەس، تۅشۅك جاڭىرتۇۇ، جاش قىزدارعا باش بايلوو مەنەن تارىحقا ۅز ىزدەرىن قالتىرات. جۇماعۇلوۋ، جۇمالىيەۋ، چىنعىشەۋ، مۇرالىەۋ، باكىيەۋ. ىراس ىراماتىلىق جۇمابەك ئبرايىموۋ عانا ۅمۉرۉنۉن اقىرىنا چەيىن بارماقتايىنان باش قوشقون ۅمۉرلۉك جۇبايى مەنەن جاشادى. ۇشۇندان ۇلام،  بئر وقۇيا ەسكە تۉشۅت.ۅكۉمۅتتۉن قايسى بئر جىيىنى اياقتاپ قالعاندا ال كەزدەگى "بۇۇداي" ماملەكەتتىك ئشقاناسىنىن جەتەكچىسى ىراماتىلىق جۇمعالبەك امانبايەۋ ەكىس-اجو اقايەۋگە قايرىلىپ "اي اسقار، مەنى دەلە ەكى ايعا پىرەمەر-مئنىستىر قىلىپ دايىنداپ قويسوڭ بولو" دەپ كۉلۅت.

        (جۇمعالبەك بەكسۇلتانوۋئچ مەنەن جاقىندان تاانىشىپ قالعاندىقتان،  ال كىشى ار دايىم تاماشا مەنەن كىشىنى ازىلدەپ سۉيلۅگۅن، باشقا چىنوۋنىكتەردەي جاسالما جالپاقتاپ "وۋئچ" "وۋنا" دەگەن تەرمىندەردى ووزانباي، ال تۇرعاي ەكىس اجونۇ دا اقايەۋىچ دەبەي اسقار دەپ اتىنان ايتا تۇرعانىن ۅزۉ دا بئر نەچە ىرەت ورۇسچا قىرعىزچا ارالاشتىرىپ سۅگۉنۉپ وتۇرۇپ ايتىپ بەرگەن.) چوچۇپ كەتكەن اقايەۋ "جۇمعالبەك بەكسۇلتانوۋئچ، ەمنە بولۇپ كەتتى؟ بئزدە پىرەمەر مئنىستىر جاقشى ەلە ىشتەپ جاتات عو " دەسە،  " مەن دەلە پىرەمەر-مئنىستىر امانگەلدى مۇرسادىقوۋىچتەي بولۇپ تۅشۅك جاڭىرتىپ الايىن دەدىم ەلە"،  دەپ تەگەرەگىندەگىلەردى كۉلدۉرۉپتۉر.  انىسى سىڭارى،  بىزدە پىرەمەر-مئنىستىر بولعوندور ئشتى العاچ جۇباي الماشتىرۇۇدان باشتاارىن جوعورۇدا ايتتىق. قوقۇس ازىرقى ۅكۉمۅت باشچىسى ۉچ ايدىن ىچىندە تۅشۅك جاڭىرتقانعا ۉلگۉرسۅ، بەركى جاش جەڭەبىز...
           وقۇرمان كەچىرىپ قويور، بئروق، ۅز ەلىنە ۉلگۉ بولچۇ ۅكۉمۅت باشچىلارى قوومدۇ وڭدوونۇن وردۇنا تەسكەرىسىنچە مورالدىق جاقتان بۇزۇشۇ ەلە تاماشانى ەمەس، ۅكۉمۅتكۅ بولعون ىرەنجۉۉنۉ پايدا قىلات،  بۇل ەمى ايلاسىز سۅز.
          ەبەگەيسىز ۇقۇقتۇۇ،  بئروق پادىشالىق ۅمۉرۉ قىسقا پىرەزىدەنتىبىز جاڭى ۅكۉمۅتتۉن قۇرامىن "ۋئنەگرەد" قىلىپ تۉزۉپ جاتىپ، "تەحنىكالىق ۅكۉمۅت" دەگەن فورمۇلىروۋكا مەنەن ۅز جۉزۉن ساقتاپ قالعىسى كەلدى. تىلەككە قارشى قوومچۇلۇق، ۅزگۅچۅ ساياساتتاشقان بئزدىن قووم تەحنىكالىق ۅكۉمۅتتۉن قۇرامىن اچىق ەلە جاقتىرباستان، روزا ئساقوۋناعا تئش قايراعاندار كۅبۅيۉپ، ازىرتادان ەلە بىيلىككە ىشەنبۅۅچۉلۉك جارالدى. ۅزگۅچۅ جاشتار اراسىندا. ازىر اپرەلدەگى قان تۅگۉۉ ۇشۇلار ۉچۉن بولدۇ بەلە دەگەن قوومدۇق پىكىر كۉچ،  بۇل چىندىق.
        ۅلكۅ جىيىرما جىلدىن ىچىندە قاندايچا ىتكە مئندى؟ وشول ۇباقىتتا تالانىپ، تونولعون، سويۇزدان مۇراستالعان ئرى ئشقانالار، چاقان زاۋوددور كىمدەردىن قۇلقۇنۇنا ئت بەكەر قۇيۇلۇپ كەتتى؟ قايسى ازىرقى تەحنىكالىق ۅكۉمۅت مۉچۅلۅرۉ بىزنەسمەندەرگە"كىرىشا"؟
         جە باارىن تەڭ ەلە اقايەۋ ماسكۅۅگۅ چۅنتۅگۉنۅ سالا كەتتى بەلە؟ البەتتە جوق!
         ماسەلەن،  اقايەۋ مەنەن باكىيەۋ ۅلكۅنۉن تالقالانىشىنا، ەكونومىقانىن ىتكە مئنىپ قالىشىنا قانچالىق جووپكەر بولسو، ازىرقى تەحنىكالىق ۅكۉمۅتتۉن قۇرامىنىن باسىمدۇۇ بۅلۉگۉ، وشول ەكى ەكىس-اجودوي ەلە دەڭگەەلدە جووپكەر. بولبوسو اقايەۋ مەنەن باكىيەۋ ۅلكۅنۉ تالاپ جاتقاندا "بئز جۅن عانا جاش جۇبايلارىبىزدىن جانىندا جاتقانبىز" دەپ ەچ كىمىسى ايتا البايت. وشول ەلە مۇرالىيەۋ، اعا قوشۇلۇپ جانتۅرۅ ساتىبالدىيەۋ. ەمنە ۉچۉن؟ انتكەنى،  ەكى بىيلىكتە تەڭ قىيىر دا تىكەلەي دا تاباقتاش بولۇشقان.
          ماسەلەن 2000-جىلى ۅتۅ تۇرعان پىرەزىدەنتتىك شايلوو الدىندا ال كەزدەگى پىرەمەر-مئنىستىر،  مۇرداعى وش وبلۇسۇنۇن گۇبەرناتورۇ امانگەلدى مۇرالىيەۋ تۉشتۉككۅ بارىپ، ۅزبەك دىياسپوراسى مەنەن جولۇعۇپ "مەن پىرەزىدەنتتىككە تالاپكەرلىگىمدى قويويۇن، قانداي قىلابىز؟" دەگەن تاكلىپ مەنەن بارعانى، انى قايرا ەلە ۇلۇتتاش ۅزبەك دىياسپوراسىنىن "اتاماندارى" بئزدىن ۇقۇق قورعوو قىزماتتارىنا ايتىپ قويعونۇن ۇنۇتا ەلەك بولسوق كەرەك.
            مەن بۇل ماسەلەنى ەمنە ۉچۉن اچىقتاپ جاتام؟ انتكەنى، ازىرقى تەحنىكالىق ۅكۉمۅت باشچىسى وشتو گۇبەرناتور بولۇپ تۇرعاندا،  ۅزبەك ىشكەرلەرىنە كۅپتۅگۅن وبۉيەكتىلەردى تەكەيدەن ارزان بااعا مەنچىكتەشتىرىپ بەرگەن. ال توقتومۇ قاشايىپ، ۅزبەكتەردىن چايقاناسىنان سامسا ورولۇپ چىققانى بەلگىلۉۉ.
            انان ەلە روزا ئساقوۋنا "بىزگە گارۋارردى بۉتۉپ كەلگەن جاشتاردى ۉيرۅتۉۉگۅ ۇباقىت جوق، مىنا بۇلار پىروفەسسىيونالدار" دەپ ووزدۇ اچىرات. جوق، ايىم اجو!
            سئز مئنتىپ جاشتاردى تۅشكۅ تۉرتسۅڭۉز، تەرەڭ جاڭىلاسىز. مەن چەت جەردەگى جاشتاردى الىپ كەلىپ، كىرەسلوعو وتۇرعۇزۇڭۇز دەبەيم، بئروق اقىرقى ەلە ون جىلدىقتا اتقارۇۇ بىيلىگىنىن ورتونقۇ زىۋەنوسۇندا جۉرگۅن ەلۉۉ جاشقا چەيىنكى مىقتى ادىستەردى تانداپ تۇرۇپ، بىيلىككە الىپ كەلۉۉ مەزگىلى جەتتى عو دەگەن ويدومۇن. جاڭىلىشپاسام،  سئز جاش جىگىتتەردىن قانىنىن ارتى مەنەن بىيلىككە كەلسەڭىز كەرەك ەلە.
           سۅز اقىرىندا،  روزا ئساقوۋنا بىيلىككە مۇرالىيەۋدى الىپ كەلىپ ۅزبەكتەردىن، كوستيۇكتۇ الىپ كەلىپ ورۇستۇن كۅڭۉلۉن الام دەگەن دئپلوماتىيالىق قۇۇلۇعۇ ۅز ەلىندە قادىرىن تۉشۉرۉپ قويبوس بەكەن دەگەن ەلە تىلەك.
                                                         تۅلۅگۅن سۇلايمانوۋ